ថ្ងៃច័ន្ទ ទី២៧ ខែកញ្ញា ឆ្នាំ២០៥០
គេហទំព័រ ទូរទស្សន៍ភីស៊ីអិន ធីវីអនឡាញ
អភិបាលខេត្តបាត់ដំបង សម្រេចបិទផ្សារ និងទីកន្លែងប្រជុំជននានា រយៈពេល១៤ថ្ងៃ ដើម្បីទប់ស្កាត់ជំងឺកូវីដ ជាពិសេសមេរោគបំប្លែងថ្មី Delta
Thu,29 July 2021 (Time 09:38 PM)
ដោយ ៖ (ចំនួនអ្នកអាន: 110នាក់)

(បាត់ដំបង)៖ លោក ងួន រតនៈ អភិបាលខេត្តបាត់ដំបង និងជាប្រធានគណៈបញ្ជាការរដ្ឋបាលខេត្ត បានសម្រេចបិទខ្ទប់ផ្សារនានាមួយចំនួនទាំងនៅក្នុងបណ្តាទីក្រុង ស្រុក និងទីកន្លែងប្រជុំជននានាមួយចំនួន ដែលមានការប្រឈមខ្លាំង ដូចជាតំបន់ក្រហម តំបន់លឿងទុំ និងតំបន់លឿងនៅតាមក្រុងស្រុកក្នុងខេត្ត ក្នុងរយៈពេល១៤ថ្ងៃ ដើម្បីទប់ស្កាត់ជំងឺកូវីដ ជាពិសេសមេរោគបំប្លែងថ្មី Delta។

ការដាក់បទបញ្ជាបែបនេះ របស់លោកអភិបាលខេត្ត បានធ្វើឡើងនៅក្នុងកិច្ចប្រជុំបន្ទាន់មួយ នារសៀលថ្ងៃទី២៩ ខែកក្កដា ឆ្នាំ២០២១នេះ ដោយមានការចូលរួមពីលោកអភិបាលក្រុង ស្រុក មន្ទីរជំនាញពាក់ព័ន្ធនានា ដើម្បីមានវិធានការជាក់ស្តែងនៅតាមមូលដ្ឋានរបស់ខ្លួន។

នាឱកាសនោះដែរលោក ងួន រតនៈ បានផ្តល់មតិថា យើងត្រូវរឹតបន្តឹង និងការអនុវត្តសេចក្តីរបស់រាជរដ្ឋាភិបាលស្តីពី ការបិទខ្ទប់ក្នុងភូមិសាស្រ្តខេត្តនានា ដែលជាប់ព្រំដែនខ្មែរ-ថៃ ដើម្បីទប់ស្កាត់ការឆ្លងរាលដាលក្នុងសហគមន៍ នៃមេរោគកូវីដ១៩ ប្រភេទដែលតា (Delta) និងសារាចរស្តីពី ការដាក់ចេញយុទ្ធការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩។

លោកអភិបាលខេត្តបានប្រាប់ «ឱ្យអាជ្ញាធរតាមបណ្តាលស្រុកឱ្យជួយផ្សព្វផ្សាយបន្តដល់ប្រជាពលរដ្ឋ គឺឪពុកម្តាយប្រាប់បន្តទៅកូនដែលជាពលករនៅប្រទេសថៃ កុំទាន់ចូលមកស្រុកខ្មែរអី ដើម្បីចៀសវាង នៃមេរោគឆ្លងចូលមកក្នុងស្រុកយើង ដោយរងចាំសភាពការឱ្យស្ងប់ស្ងាត់សិន ចាំចូលមកលេងផ្ទះក្នុងស្រុកខ្មែរដូចមុនបាន»។

លោកអភិបាលខេត្ត បានឯកភាពតាមសំណូមពរ របស់លោកអភិបាលស្រុកមួយចំនួនដែលស្ថិតក្នុងតំបន់ក្រហម សុំបិទផ្សារនានា និងទីកន្លែងនានាមួយចំនួនទាំងស្រុង ក្នុងរយៈពេល១៤ថ្ងៃនេះផងដែរ។ សូមអាជ្ញាធរមូលដ្ឋានរឹតបន្តឹងដល់ប្រជាពលរដ្ឋដែលមិនព្រមអនុវត្តតាមវិធានការ របស់ក្រសួងសុខាភិបាល ដែលមិនទាន់បានត្រឹមត្រូវដូចជា អ្នកញៀនលេងល្បែងស៊ីសងប្រមូលផ្តុំគ្នា គឺជាប្រភពនៃការចម្លងរោគយ៉ាងឆាប់រហ័សជាងគេ និងប្រភពឆ្លងរោគតាមរូបភាពផ្សេងៗទៀត ដូច្នេះ អាជ្ញាធរមូលត្រូវអនុវត្តគោលនយោបាយភូមិ ឃុំមានសុវត្ថិភាព ដើម្បីលុបបំបាត់ទីតាំងណាដែលជាប្រភពនាំឱ្យឆ្លងរោគកូវីដ១៩នេះ ឱ្យបានផងដែរ។

បើតាមលោក សឿម ប៊ុនរិទ្ធ អភិបាលរងខេត្ត បានបញ្ជាក់ប្រាប់អ្នកសារព័ត៌មានថា ខេត្តបាត់ដំបង មានក្រុង១ និងស្រុកចំនួន១៣ ហើយស្រុកដែលប្រឈមឆ្លងខ្លាំងជាគេនោះ មានចំនួន៤គឺទី១៖ ក្រុងបាត់ដំបង, ទី២៖ ស្រុកមោងឬស្សី, ទី៣៖ ស្រុកកំរៀង និងទី៤៖ ស្រុកថ្មគោល ចំពោះស្រុកផ្សេងទៀត ក៏មានឆ្លងផងដែរ តែត្រូវតែរកវិធានការទប់ស្កាត់ការរាលដាលឆ្លងដល់មនុស្សជាច្រើនកន្លងមក ហើយឱ្យចំនួននៃការឆ្លងនេះ មានការធ្លាក់ចុះវិញឱ្យទៅតិចបំផុតផងដែរ។

សូមជម្រាបថា សម្តេចតេជោ ហ៊ុន សែន នាយករដ្ឋមនម្ត្រីនៃកម្ពុជា នាយប់ថ្ងៃទី២៨ ខែកក្កដា ឆ្នាំ២០២១ ម្សិលមិញ បានចេញសេចក្តីសម្រេចបន្ទាន់មួយដោយបិទខេត្តជាប់ព្រំដែនថៃទាំងអស់ មិនឱ្យធ្វើដំណើរឆ្លងកាត់នោះឡើយ។ ការសម្រេចបែបនេះ បន្ទាប់ពីមានការរកឃើញអ្នកឆ្លងមេរោគកូវីដ១៩ បំប្លែងថ្មី Delta នៅក្នុងខេត្តមួយចំនួន។

យោងតាមសេចក្តីសម្រេចនេះ រាជរដ្ឋាភិបាល បានសម្រេចបិទខ្ទប់ភូមិសាស្ត្រខេត្តកោះកុង, ពោធិ៍សាត់, បាត់ដំបង, ប៉ៃលិន, បន្ទាយមានជ័យ, ឧត្តរមានជ័យ, ព្រះវិហារ និងខេត្តសៀមរាប។ ក្នុងសេចក្តីសម្រេច បានបញ្ជាក់ថា ការសម្រេចបែបនេះ ដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ១៩ បំប្លែងថ្មី Delta។

ការបិទនេះមានរយៈពេល ១៤ថ្ងៃ ដោយគិតចាប់ពីម៉ោង ២៣៖៤៥នាទីថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១៕

ព័ត៌មានគួរចាប់អារម្មណ៍

លោកឧត្តមសេនីយ៍ទោ​ សាត​ គឹមសាន​ ដឹកនាំកិច្ចប្រជុំពីលទ្ធផលការងាររយៈពេល៩ខែ​ឆ្នាំ​២០​២​១​និងទិសដៅបន្តសម្រាប់អនុវត្តនាពេលខាងមុខ ()

ព័ត៌មានគួរចាប់អារម្មណ៍

សាលាដំបូង និងអយ្យការអមសាលាដំបូងខេត្តពោធិ៍សាត់ ឧបត្ថម្ភគ្រឿងសម្ភារបរិក្ខារ ជូនរដ្ឋបាលខេត្ត ដើម្បីចូលរួមក្នុងវិធានការបង្ការ ការពារ និងទប់ស្កាត់ជំងឺកូវីដ១៩ ()

ព័ត៌មានគួរចាប់អារម្មណ៍

កងកម្លាំងជួរមុខទិសយោធភូមិភាគទី៥ ចាប់ផ្តើមដំណើរការចាក់វ៉ាក់សាំងកូវីដ១៩ ដូសទី៣ ()

ព័ត៌មានគួរចាប់អារម្មណ៍

មន្ត្រីជាន់ខ្ពស់ក្រសួងសាធារណការ សំណូមពរដល់ពលរដ្ឋជួយថែរក្សាសម្បត្តិជាតិឱ្យបានគង់វង្ស កុំដឹកជញ្ជូនលើសទម្ងន់កំណត់ដែលបង្កឱ្យផ្លូវឆាប់ខូច ()

ព័ត៌មានគួរចាប់អារម្មណ៍

ប្រកាសចូលកាន់តំណែងអភិបាលរងខេត្តព្រះវិហារ, លោក យ៉ុង គឹមហ៊ាន ជំនួសលោក គោ ស៊ុប៊ុនសឿត ដែលផ្ទេរភារកិច្ចទៅកាន់តំណែងជាអភិបាលរងខេត្តប៉ៃលិន ()

វីដែអូ